ఇంత నెగటివ్ షేడ్స్ ఉన్న పాత్రని మహేష్ ఒప్పుకోవడం ఆశ్చర్యమే. ఇలాంటి పాత్రలు పక్కా మాస్ హీరోలైన రవితేజ, గోపీచంద్ లాంటి వాళ్ళకి పరవాలేదేమో. నాకైతే పూరీ, తన సినిమాలన్నీ రవితేజ కోసం వ్రాసుకున్నట్లే అనిపిస్తుంది.

తెలుగు సినిమా కథకి పెద్దగా లాజిక్కులుండవు కానీ, మరీ ఇంతగా లాజిక్, రీజనింగ్ ఏమీ లేని సినిమాని ఈ మధ్య చూడలేదు. ఇందులో హీరో ఏమి చేయాలనుకుంటే అది, తన ఇష్టమొచ్చినట్టు చేసేస్తాడు. ఎందుకు చేస్తున్నాడో, దానికీ అర్థముండదు. ఈ సినిమాలో ఎడిటర్ ఎక్కువ పని చేసాడో, సెన్సార్ వాళ్ళు ఎక్కువ పని చేసారో చెప్పడం కష్టం. సెన్సార్ వాళ్ళు ఇదివరకు మాటలనే మ్యూట్ చేసేవాళ్ళు. ఇప్పుడు దృశ్యాలని కూడా బ్లర్ చేయాల్సివస్తోంది.

మిల్క్ బాయ్ లాంటి మహేష్ ఏమిటి? ఆ డైలాగులేమిటి? అభిమానులు ఎలా ఒప్పుకుంటారు?
మహేష్ బాబూ, ఇలాంటి డైలాగులు आप को शोभा नहीं देता.

ఇందులో కొన్ని స్ఫూర్తివంతమైన డైలాగులు ఉన్నా, అవి కూడా బూతుల్లో కొట్టుకుపోయాయి. హీరో చివరలో ఇచ్చే సందేశం ( ఏ లక్ష్యం లేని వాళ్ళు చచ్చిపోండి, సమాజానికి మీ అవసరం లేదు ) బాగున్నా, అది పాత్రోచితంగా లేదు. ఈ సందేశం విన్నాకా, నేను నా మొట్టమొదటి టపా ఆరంభం లో వ్రాసుకొన్న ఈ వాక్యం ( ఏమీ సాధించని జీవితం కంటే మృత శిశువుగా జన్మించడం ఉత్తమమా? ) గుర్తొచ్చింది.

ఖలేజా సినిమాలో ఇలాగే మహేష్ చేత అతిగా వాగించినందువల్లే ఎవడూ రెండోసారి చూడలేదు. దూకుడు సినిమాలో ఎక్కువ డైలాగులు ఉన్నా, శృతి మించలేదు కాబట్టి అందరికీ నచ్చింది. నిజానికి బిజినెస్‌మేన్ సినిమాకి దూకుడు అని పేరు పెట్టాల్సింది. ఇందులో మహేష్ ప్రతీ సీనులోనూ దూకుడుగానే ఉంటాడు.

పూరీ జగన్నాథ్ గారూ, మీలోని ఆవేశాన్నీ, కసినీ ఇలా కాకుండా పాజిటివ్‌గా ప్రజంట్ చేస్తే ఒక శంకర్ లాగా గ్రేట్ అనిపించుకొంటారు. మున్నా భాయి లాంటివాళ్ళు గాంధీగిరి చేస్తుంటే, మీ సూర్య, భాయి అవడం బాగుందా? మీరు కసితో లగాన్, చక్ దే ఇండియా లాంటి పాజిటివ్ సినిమాలు తియ్యండి. అందరూ మిమ్మల్ని అభినందిస్తారు.

యువతకి బ్రాండ్ అంటే అబ్దుల్ కలాం, అన్నా హజారే లాంటి వాళ్ళు కాని సూర్యా భాయ్ కాదు సార్. రాంగోపాల్‌వర్మ సినిమాలు తెలుగువాళ్ళు చూడడం మానేసారు. మీరూ ఇంకా అలాంటివే తీస్తే ఎలా? ఇందులో మహేష్ హీరో కాబట్టి ఒంటిచేత్తో సినిమాని లాక్కొచ్చాడు. మరో హీరో అయితే ఇంత హైప్ వచ్చేదే కాదు.

అందరికీ సంక్రాంతి శుభాకాంక్షలు.

“మనమంతా భయం, ప్రమాదం అనే వ్యాధులతో తీవ్రంగా బాధపడుతున్నాం.
చరిత్ర ఎప్పుడూ పిరికివాళ్ళచేత సృష్టించబడలేదు.”

ఆయన ఈ కోట్ చెప్పిన సందర్భం అణుశక్తికి సంబంధించినది కాబట్టి ఈ విషయంలో చాలామందికి అభిప్రాయభేదాలు ఉండవచ్చు.
కాని జనరల్‌గా ఆలోచిస్తే ఎంతో అర్ధవంతమైన, పాజిటివ్ కోట్ ఇది. ఇది ఆయన స్వంతంగా చెప్పిందో లేక ఎవరైనా ఇదివరకే చెప్పినదో తెలియదు కాని నాకు నచ్చింది.

టైమ్స్ ఆఫ్ ఇండియాకు కృతజ్ఞతలు.

ఏమిటి, ఈ కథ మాకు తెలుసు అంటున్నారా? “ఆది” సినిమాలోని ఎల్ బి శ్రీరాం ఎపిసోడ్ గుర్తొచ్చిందా? ఈ కథ “ఆది” సినిమాకి పరుచూరి బ్రదర్స్, వి వి వినాయక్ వ్రాసింది కాదండి. ఇది గెరాల్డ్ లిల్లీ అనే బ్రిటీషర్ వ్రాసిన “ఉపమానం” అనే విదేశీ కథ.
నేను కొన్ని నెలల క్రితం విజయవాడ వెళ్ళినపుడు ఏలూరు రోడ్డులో కొన్న పుస్తకాల్లో మల్లాది వెంకట కృష్ణమూర్తి అనువదించిన “విదేశీ కథలు” పుస్తకం ఒకటి. మొన్న ఈ పుస్తకంలోని కథలు చదువుతుండగా, ఈ కథ నా దృష్టిని ఆకర్షించింది. మన సినిమావాళ్ళు ఎక్కడెక్కడినుంచో ఇన్‌స్పైర్ అవుతున్నారు కదా అనిపించింది. ఈ పుస్తకంలో ఇలాంటి మంచి కొసమెరుపు కథలు చాలా ఉన్నాయి. నేనూ ఇంకా పూర్తిగా చదవలేదు. సగం కథలే చదివాను. విదేశీ కథలు కాబట్టి కొన్ని విచిత్రంగా, ఆశ్చర్యకరంగా ఉన్నాయి. కానీ ఇంట్రష్టింగానే ఉన్నాయి. వీలైతే ఈ చిన్న పుస్తకాన్ని చదవండి.

First day first ride చెయ్యాలని అనుకుని, నిన్న రాత్రి ఏడు గంటలకు మెట్రో స్టేషన్ చేరుకున్నాను. ఎం జి రోడ్ స్టేషనులో రష్ బాగా ఎక్కువగా ఉందని హలసూరు స్టేషనుకి వెళ్ళాను. అక్కడ నుంచి బయ్యప్పనహళ్ళి వరకు ప్రయాణించి మళ్ళీ హలసూరుకి తిరిగి
వచ్చాను. మొదటిరోజే ప్రయాణించాలన్న కోరిక ఢిల్లీ మెట్రోలో తీరకపోయినా, ఇక్కడ తీరింది. స్టేషనులన్నీ వరల్డ్ క్లాసో కాదో కాని, ఎస్కలేటర్లు లాంటి సదుపాయాలతో ఆధునికంగానే ఉన్నాయి.

ప్రస్తుతం సుమారు 7 కిలోమీటర్లు మాత్రమే మొదలవ్వడం వలన మెట్రో ప్రభావం అంతగా కనపడకపోయినా, మరిన్ని మార్గాల్లో కూడా ప్రారంభమయితే ట్రాఫిక్ కష్టాలు కొంత తీరవచ్చు. బైకులూ, బస్సులూ తగ్గ వచ్చు. ఆటోల అవసరం కూడా తగ్గుతుంది. నిజానికి ఇదే మెట్రో పది, పదిహేనేళ్ళక్రితం మొదలయివుంటే, ఈ రోజు ఇంత ట్రాఫిక్ సమస్య ఉండేది కాదు.

కోల్ కతా, ఢిల్లీ మెట్రోల తరువాత మొదలైన నమ్మ మెట్రో, దక్షిణాదిలో మొదటి మెట్రో.
ముంబయి, చెన్నయి, జైపూర్ లలో కూడా మెట్రోల నిర్మాణం జరుగుతోంది. వీటికంటే ముందు ముంబయి మోనోరైలు ప్రారంభమవవచ్చు.
కాని హైదరాబాద్ మెట్రో పరిస్థితి మాత్రం కొన్ని సంవత్సరాలుగా ఎక్కడ వేసిన గొంగళి అక్కడే ఉన్నట్టు ఉంది. ఆనాటి రాష్ట్ర ప్రభుత్వం Metro Man శ్రీధరన్ సలహా విని ప్రభుత్వ పరంగా నిర్మాణం చేపట్టి ఉంటే ఈపాటికి కొంత మార్గమయినా ప్రారంభమయిఉండేది.
నవీ ముంబయి, కొచ్చి, పూణే లాంటి చిన్న నగరాలలో కూడా మెట్రోల నిర్మాణానికి ప్రయత్నాలు మొదలయ్యాయి. కానీ వైజాగ్, విజయవాడల గురించి మాత్రం ఎవరూ పట్టించుకోరు.

ఏ ముహుర్తాన సత్యం రామలింగరాజు తన కుంభకోణాన్ని తానే బయటపెట్టుకుని జైలుకెళ్ళాడో కాని అప్పటినుంచి వరుసగా స్కాములే, స్కాములు వెలుగు చూస్తున్నాయి.

గత సంవత్సరం నుంచీ ఈ స్కాముల రన్ రేట్ పెరిగితే ఈ మధ్య అరెస్టుల రన్ రేట్ పెరుగుతోంది.
ముందు రాజా తరువాత కనిమోళి, కల్మాడి, ఇలా అరెస్టుల లిస్టు పెరుగుతూనే ఉంది. కొద్దిరోజులక్రితమే జనార్ధన రెడ్డి సోదరునితో సహా జైలుపాలయ్యాడు. ఆ తరువాత అమర్ సింగ్, ఇంకో ఇద్దరు బి జె పి కి చెందిన మాజీ ఎం పి లతో తీహార్ బాట పట్టాడు.

ఇక్కడ బెంగుళురులో కట్టా వారి తండ్రీ, కొడుకులు జైలులో ఉన్నారు. లేటెస్టుగా ప్రముఖ కన్నడ హీరో దర్శన్ ని జైలులో పెట్టారు. లక్కీగా కుమారస్వామి దంపతులకి బెయిల్ దొరికింది.
ఇంకా వాళ్ళనీ, వీళ్ళనీ అరెస్టు చేస్తారని ఊహాగానాలు చేస్తున్నారు. కొన్ని చోట్ల అరెస్టుల మీద బెట్టింగులు కూడా జరుగుతున్నాయని ఈ రోజు TOI లో వ్రాసారు. ఇంకా ఎంతమంది జైలుపాలవుతారో, ఏమైనా కొత్త జైళ్ళు కట్టాలో ఏమిటో.
మరి కొంతమంది స్కాములు చేసిన నాయకులు “మేరా నంబర్ కబ్ ఆయేగా” అని పాపం ఎదురు చూస్తున్నారు. ఇలాంటి వాళ్ళు ముందుగానే చిప్పకూడు, కటిక నేల అలవాటయ్యేలా ప్రాక్టీసు చేసుకోవడం బెటర్. లేకపోతే సడన్ గా అరెస్ట్ అయితే తట్టుకోవడం కష్టం.

ఒకపక్క ఢిల్లీ అంతా అణ్ణా జపం చేస్తుంటే, అదే ఢిల్లీలో ఈయన కాంగ్రెస్ జపం చేయడం ఏమి టైమింగు? ఎలాగూ కాంగ్రెసులో చేరాలని నిర్ణయించుకున్నారు కాబట్టి లోక్ పాల్ బిల్లు కథ సుఖాంతమయ్యి, అణ్ణా హజారే దీక్ష విరమించేదాకా ఆగలేరా?

“ప్రేమే లక్ష్యం, సేవే మార్గం’ అని రాజకీయాలలోకి వచ్చారు చిరంజీవి. తాను చెప్పింది నిజమే అయితే, ఈ రోజు ఆయన వెళ్ళవలసినది 24, అక్బర్ రోడ్డుకి కాదు. రాం లీలా మైదానానికి. చిరంజీవి కలవవలసినది రాహుల్ గాంధీని కాదు. అణ్ణా హజారేని.

మహాత్మా గాంధీ, అంబేద్కర్, జ్యొతిబా ఫూలేల చిత్రపటాల ముందు ప్రసంగించిన చిరంజీవికి వాళ్ళలో అణ్ణా హజారే కనపడలేదా? పార్టీని కాంగ్రెసులో కలిపేసిన తరువాత చిరంజీవి రాజకీయాలనుండి తప్పుకుని అణ్ణా హజారే ఉద్యమానికి మద్దతు ఇచ్చి ఉంటే ఆయన గౌరవం పెరిగేది. చిరు అభిమానులారా, మీరైనా చెప్పండి మీ నట నాయకుడికి, చరిత్రలో ఒక మంచి పేజీ వ్రాసుకోమని.

అణ్ణాని దేశప్రజలంతా సమర్ధిస్తున్నారు, కొన్ని పార్టీలవారు తప్ప. స్వాతంత్రానంతరం దేశానికి, కేంద్ర ప్రభుత్వానికీ, మరోసారి సత్యాగ్రహం శక్తి ఏమిటో అణ్ణా చూపించారు. ఆయనమీద ఆరోపణలు చేసినా ప్రజలు పట్టించుకోలేదు. ఎందుకంటే ఆరోపణలు చేసే స్థాయి అధికారపార్టీలో, ఆమాట కొస్తే ఈనాటి రాజకీయనాయకులలో ఎవ్వరికీ లేదు. ఇప్పుడు చాణ్ణాళ్ళ తరువాత విదేశీ హస్తం అనే పాత అస్త్రాన్ని బయటకు తీసారు.
అణ్ణా ఒక వేళ తప్పు చేసినా, అది తప్పు అని చెప్పే నైతిక బలం ఉన్న నాయకులు మనకు లేకపోవడం దురదృష్టం. మన నాయకులు మనకి చెప్పేదేమిటంటే, నిర్ణయాలు, శాసనాలు అన్నీ వాళ్ళే చేస్తారు. ఎవరూ నోరు విప్పి ఎందుకూ అని అడగకూడదు. పన్నులు మాత్రం నిక్కచ్చిగా కట్టాలి.
VOTE & FORGET అనేది వీళ్ళు మనకిచ్చే నినాదం.

అణ్ణా ఉద్యమం ప్రజాస్వామ్యానికి వ్యతిరేఖం అంటున్నారు. ప్రజలు ఉద్యమిస్తే తప్పు అనడం ఏ విధమైన ప్రజాస్వామ్యం? మరి ప్రజాస్వామ్య వ్యవస్థలు సరిగా పని చేస్తే ఇంత అవినీతి ఎందుకు జరుగుతోంది? ద్రవ్యోల్బణం ఎందుకు పెరుగుతోంది? కోర్టులు కలుగచేసుకొనేదాకా అవినీతిపరులకి శిక్ష ఎందుకు పడటం లేదు?
ఈ సమస్యలమీద ఉద్యమం చేయవలసిన ప్రతిపక్షం ఎందుకు సీరియస్ గా చేయడంలేదు? ఈ రోజు ప్రతిపక్షం చేయాల్సిన పనిని అణ్ణా చేస్తున్నారు. ప్రజలు అణ్ణాకు ఇంత మద్దతు ఇవ్వడానికి కారణం జన లోక్ పాల్ బిల్లు మీద ఆసక్తి కన్నా అవినీతిపై వ్యతిరేఖతే. 

నేను అణ్ణా ఉద్యమాన్ని సమర్ధిస్తాను. కాని ఇలా నిరవధికంగా నిరాహార దీక్ష చేయడాన్ని మాత్రం సమర్ధించను. ఉద్యమం చెయ్యడానికి ఎన్నో మార్గాలు ఉన్నాయి. ఈ రొజు దేశం మొత్తం ఆయనతో కలిసి నడుస్తోంది. ఇలాగే ప్రజలని చైతన్యపరిచి ఊరూ వాడా, శాంతి ప్రదర్శనలతో ప్రభుత్వాన్ని దిగి వచ్చేలా చెయ్యాలి కాని తీవ్రమైన దీక్షలతో ప్రభుత్వాన్ని ఎమోషనల్ బ్లాక్ మెయిలింగ్ చేయడం పధ్ధతి కాదు. ఒకవేళ ఈ దీక్షలో అణ్ణాకి ప్రాణాపాయం కలిగితే, జరిగే దుష్పరిమాణాలకి ఎవరు బాధ్యత వహిస్తారు? ఎక్కువరోజులు దీక్ష చెయ్యడం కన్నా, మెరుగైన లోక్ పాల్ బిల్లు తీసురావడానికి ప్రాధాన్యం ఇవ్వాలి.
అణ్ణా కోరుకునే జన లోక్ పాల్ బిల్లు యధాతధంగా అమలులో తేవడానికి ఏ రాజకీయ పక్షమూ సహకరించదు కాబట్టి ఇచ్చి పుచ్చుకునే పధ్ధతిలో వ్యవహరిస్తేనే రెండు పక్షాలవారికీ విజయం లభిస్తుంది.
 

బెంగాల్ ఎన్నికలలో మమతా బెనర్జీ భారీ మెజారిటీతో గెలిచి ముఖ్యమంత్రి అవబోతున్నారు కాబట్టి, కేంద్రంలో రైల్వే మంత్రి పదవి ఖాళీ అవుతుంది. ఆ పదవిని మళ్ళీ తృణముల్ కి కట్టబెట్టకుండా మన రాష్ట్రానికి చెందిని నాయకుడికి వచ్చేలా UPA పై ఒత్తిడి తేవాల్సిన భాద్యత మన రాష్ట్ర నాయకులందరిమీదా ఉంది. అంతమంది MP లు ఉన్నా కేంద్ర మంత్రివర్గంలో మన రాష్ట్రానికి ఏ మాత్రం ప్రాధాన్యం లేదు. ఇప్పుడు రైల్వే శాఖని మన రాష్ట్రానికి చెందిన నాయకుడికి ఇస్తే కొంతైనా న్యాయం జరుగుతుంది.

చాలా ఏళ్ళుగా రైల్వే శాఖ ఉత్తరాది వ్యక్తుల చేతిలో ఉండి దక్షిణాదికి, అందులోనూ మన రాష్ట్రానికి చాలా అన్యాయం జరుగుతోంది. ఎప్పుడో పి వి నరసింహా రావు గారు ప్రధానమంత్రిగా ఉన్నప్పుడు చేపట్టిన గేజ్ కన్వర్షన్ ప్రాజెక్టుల తర్వాత చెప్పుకోతగ్గ ప్రాజెక్ట్ ఏదీ మన రాష్ట్రానికి రాలేదు. ఇప్పటికే అమోదం పొంది, ప్రారంభమైన పనులు కూడా నత్తనడక నడుస్తున్నాయి. ప్రతీ రైల్వే బడ్జెట్ లోనూ మనకి కొత్త ఆశలే తప్ప వాస్తవంలో ఏమీ జరగడంలేదు.

ఇప్పుడు మమతా బెనర్జీ నిష్క్రమణతో రైల్వే మంత్రి పదవి ఖాళి అవుతోంది కాబట్టి ఈ అవకాశం మనం వదులుకోకూడదు. UPA చిరంజీవికి గౌరవప్రదమైన పదవి ఇవ్వాలనుకుంటే రైల్వే మంత్రిని చేయడం చక్కని అవకాశం. మిగిలిన భేదాలన్నీ పక్కన పెట్టి రాష్ట్ర నాయకులంతా ఈ విషయంలో చిరంజీవికి మద్దతు ఇవ్వాలి. చిరంజీవి కూడా ఏ పదవి వచ్చినా, గతంలో చేసిన తప్పులు చేయకుండా స్వంత డైరక్షన్లో పని చేస్తాడని ఆశిద్దాం.